کراچی: ن لیگی وفد کی ایم کیو ایم اور جی ڈی اے قیادت سے ملاقاتیں، الیکشن اتحاد پر اہم پیشرفت

پاکستان مسلم لیگ ن کے صدر شہباز شریف کی سربراہی میں ن لیگی  وفد کے دو روزہ دورہ کراچی میں متحدہ قومی موومنٹ (ایم کیو ایم) پاکستان اور گرانڈ ڈیموکریٹک الائنس (جی ڈی اے) کی قیادت سے  ملاقاتیں کرکے الیکشن اتحاد پر تبادلہ خیال کیا گیا۔

کراچی سے قومی اسمبلی کی نشست این اے 242 سے الیکشن لڑنے کا اعلان کرتے ہوئے ن لیگ کے صدر شہباز شریف کا کہنا تھا کہ ایم کیو ایم رہنماؤں سے ملاقات میں این اے 242 پر سیٹ ایڈجسٹمنٹ سے متعلق کوئی بات نہ ہو سکی۔

انتخابی حلقے میں پارٹی ورکرز سے خطاب کرتے ہوئے شہباز شریف نے کراچی میں ٹرانسپورٹ کا مسئلہ حل کرنے کا وعدہ کیا۔

انہوں نے کہا کہ کراچی پاکستان کا گیٹ وے ہے، اورنج لائن لاہور سے پہلے کراچی میں چلنی چاہیے تھی۔

سابق وزیراعظم کا کہنا تھا کہ حیدرآباد سے کراچی تک اب موٹر وے نہیں رہی، نواز شریف وزیر اعظم بنے تو موٹر وے بھی بن جائے گی۔

جی ڈی اے سربراہ پیر پگارا سے ملاقات کے بعد میڈیا سے بات چیت کرتے ہوئے ن لیگی رہنما خواجہ سعد رفیق نے کہا کہ ایم کیو ایم، جے یو آئی اور جی ڈی اے کے ساتھ سیٹ ایڈجسٹمنٹ پر ہماری بات چیت چل رہی ہے، کوئی نہ کوئی راستہ نکل آئے گا۔

انہوں نے کہا کہ آج کی ملاقات میں یہاں سسٹم کے نام سے جاری لوٹ مار پر بات ہوئی، سندھ امن مانگتا ہے، ترقی مانگتا ہے اور بنیادی حقوق مانگتا ہے۔

ان کا کہنا تھا کہ  سندھ اور بلخصوص کراچی کو اس کا حق دلایا جائے گا۔

ملاقات کے بعد جی ڈی اے رہنما پیر صدر الدین شاہ راشدی کا کہنا تھا کہ سندھ میں مافیا کا 15 سالہ دور اور چور بازاری ختم کرنی ہے۔

انہوں نے کہا کہ ملاقات میں کچھ معاملات پر اتفاق ہوا ہے اور ہم سندھ میں اتحاد کی صورت میں الیکشن لڑیں گے۔

Leave A Reply

Your email address will not be published.