کوئٹہ چیف سیکرٹری بلوچستان شکیل قادر خان کی زیر صدارت پراونشل ٹاسک فورس برائے انسداد اسمگلنگ کا اعلیٰ سطحی اجلاس منعقد کیا گیا جس کے دوران چیف سیکرٹری کو متعلقہ حکام نے اسمگلنگ کی روک تھام سے متعلق اقدامات سے آگاہ کیا۔
اجلاس میں ایڈیشنل چیف سیکرٹری داخلہ صالح محمد ناصر، سیکرٹری خوراک مجیب الرحمن، سیکرٹری فشریز حافظ محمد طاہر، کمشنر کوئٹہ حمزہ شفقات، قانون نافذ کرنے والے اداروں کے نمائندے جبکہ آئی جی پولیس، ڈویژنل کمشنرز نے بذریعہ وڈیو لنک شرکت کی۔ چیف سیکرٹری بلوچستان نے متعلقہ محکموں اور اداروںکو ہدایت کی کہ وہ بہتر کوآرڈینیشن کا موثر نظام تشکیل دے کر یوریا اور چینی کی اسمگلنگ کی روک تھام کیلئے صوبے بھر میں آپریشن جاری رکھا جائے۔
انہوں نے چینی اور یوریا کی اسمگلنگ اور ذخیرہ اندوزی میں ملوث افراد کے خلاف سخت کارروائی کی ہدایت کر تے ہو ئے کہا کہ اسمگلنگ سے صوبے اور ملک کی معیشت پر منفی اثرات مرتب ہورہے ہیں، اسمگلنگ کی وجہ سے قیمتوں میں اضافے سے عوام کی مشکلات بڑھ رہی ہیں، چینی اور یوریا کی اسمگلنگ کی روک تھام کیلئے تمام چیک پوسٹوں پر چیکنگ کے ساتھ چینی اور یوریا کی اسمگلنگ کی روک تھام کیلئے ٹریس اینڈ ٹریک سسٹم کو بہتر بنایا جائے۔
چیف سیکرٹری نے تمام ڈپٹی کمشنرز کو متعلقہ ڈیلرز کو چینی اور یوریا فراہم کرنے کی ہدایت کی اور کہا کہ چینی اور یوریا سمیت اشیائے ضروریہ کی سرحد پار اسمگلنگ کسی صورت برداشت نہیں کریں گے جو لوگ اس غیر قانونی کام سے منسلک ہیں اور اس میں سہولت کار ہیں ان کیخلاف سب سے پہلے کارروائی عمل میں لائی جائے۔ انہوں نے کہا کہ وفاقی اداروں اور صوبائی حکومت کو اس ضمن میں مل کر کام کرنا ہوگا۔ استعداد کار کو کسی بھی غیر معمولی صورتحال کے تقاضوں سے ہم آہنگ بنانے کے لئے ضروری اقدامات اٹھائے جائیں۔
