نئی دہلی(حال نیوز)بھارت کی سیاسی جماعت کانگریس نے پچھلے 6 ماہ کے دوران ملک میں 24ہزار سے زیادہ بچیو ں کے ساتھ جنسی زیادتی کے واقعات پر گہری تشویش ظاہر کرتے ہوئے کہاہے کہ ’بیٹی پڑھاو بیٹی بچاو‘کی بات کرنے والی بھارتیہ جنتاپارٹی حکومت کو بتانا چاہیے کہ ان مجرمانہ واقعات پرقابوپانے میں وہ ناکام کیوں رہی ہے۔
کانگریس سربراہ رندیپ سنگھ سرجے والا نے ایک بیان میں کہاکہ مودی حکومت کا ’بیٹی بچاو بیٹی پڑھاو‘کانعرہ کھوکھلا ثابت ہوگیا اور بی جے پی کی قیادت میں حکومت بچیوں کے تئیں ہونے والی جنسی زیادتیوں کو روکنے میں ناکام ہورہی ہے۔
انھوں نے کہاکہ بچیوں کے ساتھ جنسی زیادتی کے بڑھتے ہوئے واقعات پر بے حس بی جے پی حکومت کوئی قدم نہیں اٹھارہی اس لیے ملک کی عدالت عظمی نے اس معاملے کا ازخود نوٹس لیاہے۔
عدالت کے ذریعے جمع کیے گئے اعداد و شمار کے مطابق اس سال یکم جنوری سے 30 جون تک 24 ہزار 212 بچیوں کے ساتھ جنسی زیادتیاں ہوئی ہیں،ان میں سے صرف 911 معاملوں کونمٹایاگیاہے۔
