ممبئی (حال نیوز)بولی وڈ اداکارہ سونم کپور ماضی میں بھی پاکستانی اداکار فواد خان کی تعریفیں کر چکی ہیں اور انہیں نہ صرف اپنے لیے اسکرین پر سب سے موزوں شخص قرار دے چکی ہیں بلکہ انہیں سپر اسٹار بھی قرار دے چکی ہیں۔فواد خان نے بولی وڈ فلموں میں سونم کپور کے ساتھ فلم ’خوبصورت‘ کے ساتھ کیریئر کا آغاز کیا تھا۔اس فلم میں فواد خان نے ایک شہزادے کا کردار ادا کیا تھا جن سے سونم کپور کو محبت ہوجاتی ہے۔
اگرچہ اس فلم کی مرکزی کہانی ہیروئن کے گرد گھومتی تھی، تاہم فلم میں فواد خان کی شاندار اداکاری کی وجہ سے انہیں متعدد بولی وڈ فلموں میں کام کی پیش کش ہوئی اور انہوں نے چند آفرز کو قبول کرتے ہوئے بولی وڈ میں بھی خود کو منوایا۔’خوبصورت‘ 2014 میں ریلیز ہوئی تھی اور اب فلم کی ریلیز کے 5 سال بعد سونم کپور نے اس فلم اور فواد خان کے حوالے سے اہم انکشاف کرکے سب کو حیران کردیا۔
اداکارہ نے انکشاف کیا ہے کہ ’خوبصورت‘ میں ان کے ساتھ کوئی بھی بھارتی اداکار کام کرنے کو تیار نہیں تھا اور انہوں نے سخت مشکلات کے بعد پاکستان سے اداکار فواد خان کو بلا کر اپنا ہیرو بنایا۔سونم کپور کا کہنا ہے کہ میں اسکرین پر فواد کے ساتھ اچھی لگتی ہوں-اپنے ایک انٹرویو میں سونم کپور نے بولی وڈ میں خواتین کی مرکزی کرداروں یا کہانیوں پر مشتمل فلموں میں درپیش مشکلات اور اقربا پروری پر کھل کر بات کی ۔
انکشاف کیا کہ بولی وڈ میں کوئی بھی اداکار خواتین کی مرکزی کہانی پر مشتمل فلم میں کام کرنے کے لیے آسانی سے تیار نہیں ہوتا۔سونم کپور نے انٹرویو میں دعویٰ کیا کہ انہوں نے نہ صرف کیریئر کے آغاز میں بلکہ اب تک وہ ہر فلم کے لیے اوڈیشن دیتی آ رہی ہیں اور انہیں فلموں میں میرٹ پر کاسٹ کیا جاتا ہے۔سونم کپور نے دعویٰ کیا کہ بھارتی اداکاروں کے انکار کے بعد انہوں نے پاکستانی سپر اسٹار فواد خان کو پاکستان سے بلایا اور انہیں اپنا ہیرو بنایا۔
