کوئٹہ (حال نیوز )وزیراعلیٰ بلوچستان جام کمال خان نے کہا ہے کہ مالی سال 2019-20ءکا صوبائی بجٹ ایک عوام دوست بجٹ ہونے کے ساتھ ساتھ حقیقی معنوں میں عوام کی امنگوں کی ترجمانی کرے گا، ماضی کی روایات سے ہٹ کر پی ایس ڈی پی کی تیاری کے لئے محکموں نے عملی طور پر کام کیا ہے، آئندہ مالی سال کے بجٹ سے عوام کا حکومت اور حکومتی اداروں پر اعتماد مستحکم ہوگا۔
ان خیالات کا اظہار انہوں نے بجٹ کی تیاری، تجاویز اور صوبائی سطح کے مجوزہ میگا پروجیکٹس کو حتمی شکل دینے کے لئے منعقدہ اعلیٰ سطحی اجلاس کے دوران کیا، صوبائی وزیر خزانہ میر ظہور احمد بلیدی، ایڈیشنل چیف سیکریٹری منصوبہ بندی وترقیات، سیکریٹری خزانہ اور دیگر متعلقہ حکام اجلاس میں شریک تھے جن کی جانب سے اجلاس کو رواں مالی سال کی ترمیم شدہ پی ایس ڈی پی اور آئندہ مالی سال کی مجوزہ پی ایس ڈی پی کے بارے میں بریفنگ دی گئی۔
وزیراعلیٰ نے کہا کہ صوبائی حکومت کی بھرپور کوشش ہے کہ نئے مالی سال کا بجٹ گذشتہ ادوار کے بجٹ سے مختلف او ربہتر ہو جو عوام کی خواہشات کا عکاس اور ان کے معاشی تحفظ کا ضامن ہو،انہوں نے کہا کہ یہ امر باعث اطمینان ہے کہ بجٹ کی تیاری میں تمام امور کا سنجیدگی سے جائزہ لیا گیا ہے، اجلاس میں آئندہ مالی سال کے ترقیاتی پروگرام میں ایسے ترقیاتی منصوبوں کو ترجیح دینے کا فیصلہ کیا گیا جن پر عملدرآمد سے غربت کا خاتمہ، مقامی سطح پر معاشی سرگرمیوں میں اضافہ، روزگار کے بہتر مواقعوں کی فراہمی، پیداواری شعبوں کی ترقی اور صوبے کے وسائل میں اضافے کے ذریعہ اسے خودانحصاری کی راہ پر گامزن کرنا ممکن ہوسکے گا۔
منصوبوں میں صحت، تعلیم، انسانی وسائل، اسکل ڈویلپمنٹ، مواصلات، زراعت، ماہی گیری، معدنیات، لائیواسٹاک، پانی، توانائی اور سیاحت جیسے شعبوں کی ترقی کو ترجیح حاصل رہے گی، پی ایس ڈی پی میں محکمانہ طور پر تیار کئے گئے منصوبوں اور حلقہ وار اسکیموں کوبھی شا مل کیا جائے گا، اجلاس میں بلوچستان کی زرعی، سمندری اور معدنی پیداوار کی مارکیٹ تک رسائی اور اس کی ویلیو ایڈیشن کے لئے کولڈ اسٹوریج، پیکنگ، گریڈنگ سمیت دیگر سہولتوں کی فراہمی کے منصوبوں پر عملدر آمد کرنے جبکہ ان منصوبوں میں پبلک پرائیویٹ پارٹنر شپ کے فروغ سے بھی اتفاق کیا گیا۔
