کوئٹہ(حال نیوز )وزیراعلیٰ بلوچستان جام کمال خان کی زیرصدارت منعقدہ اعلیٰ سطحی اجلاس میں پچیس ارب روپے کی لاگت کے کوئٹہ ترقیاتی پیکج میں شامل شہر کی مختلف سڑکوں کی توسیع اور تعمیر ومرمت کے منصوبوں کی منظوری دے دی گئی اور پروجیکٹ ڈائریکٹر کو منصوبوں پر فوری طور پر عملدرآمد کے آغاز اور مقررہ مدت کے اندر معیار کے مطابق تکمیل کی ہدایت کی گئی،صوبائی وزیر میر ظہور احمد بلیدی، چیف سیکریٹری بلوچستان ڈاکٹر اختر نذیر، ایڈیشنل چیف سیکریٹری منصوبہ بندی وترقیات، سیکریٹری خزانہ اور دیگر متعلقہ حکام اجلا س میں شریک تھے۔
کوئٹہ ترقیاتی پیکج میں شامل منصوبوں کی تکمیل سے ایک جانب تو صوبائی دارالحکومت کوئٹہ کی خوبصورتی میں اضافہ ہوگا تو دوسری جانب ٹریفک کے دبائو میں کمی اور بہائو میں بہتری آئے گی اور ٹریفک مسائل کا خاتمہ ہوگا، کوئٹہ ترقیاتی پیکج میں وفاقی حکومت کی گرانٹ شامل ہے جبکہ صوبائی حکومت نے بھی خطیر فنڈز مختص کئے ہیں، کمشنر کوئٹہ ڈویژن عثمان علی جوکہ ترقیاتی پیکج کے پروجیکٹ ڈائریکٹر بھی ہیں نے اجلاس کو پیکج میں شامل جاری منصوبوں کی پیشرفت اور مجوزہ منصوبوں کے حوالے سے بریفنگ دی۔
پیکج کے جاری منصوبوں میں پانچ ارب روپے کی لاگت سے جوائنٹ روڈ کی توسیع وتعمیراور 4.814ارب روپے کی لاگت سے سبزل روڈ کی توسیع وتعمیر اور بہتری کے منصوبے شامل ہیں جن کے لئے فنڈز صوبائی حکومت نے فراہم کئے ہیں، وفاقی اور صوبائی حکومت کے فنڈز سے نئے منصوبوں میں سریاب روڈ پر 13.9ارب روپے کی لاگت سے دوکلومیٹر طویل فلائی اوور کی تعمیر، مغربی اور مشرقی بائی پاس کو منسلک کرنے کے لئے مختلف مقامات پر نئی سڑکوں کی تعمیر، 40کروڑ روپے کی لاگت سے لنک بادینی روڈ کو دورویہ بنانے، 50کروڑ روپے کی لاگت سے ایئرپورٹ کے لئے متبادل سڑک کی تعمیر، 1.1ارب روپے کی لاگت سے سبزل روڈ کی توسیع، 2.7ارب روپے کی لاگت سے ہزارہ ٹائون مغربی بائی پاس سے مشرقی بائی پاس کو منسلک کرنے کے لئے سڑک کی تعمیر، 80کروڑ روپے کی لاگت سے سریاب روڈ ریڈیو اسٹیشن سے مغربی بائی پاس کو منسلک کرنے کے لئے سڑک کی تعمیر، 50کروڑ روپے کی لاگت سے مغربی بائی پاس تا قمبرانی روڈ کی تعمیر اور 2.4 ارب روپے کی لاگت سے ایئرپورٹ روڈ کی توسیع اور بہتری کے منصوبے شامل ہیں
اجلاس سے خطاب کرتے ہوئے وزیراعلیٰ نے کوئٹہ ترقیاتی پیکج کو شہر کی بہتری اور شہریوں کو آمدورفت کی جدید سہولتوں کی فراہمی کی جانب اہم پیشرفت قراردیتے ہوئے کہا کہ مناسب منصوبہ بندی نہ ہونے اور عدم توجہی کے باعث کوئٹہ شہر طویل عرصہ سے گوناگوں مسائل کا شکار رہا ہے بالخصوص بڑھتی ہوئی آبادی سے ٹریفک کے دبائو میں اضافہ ہوا ہے جس سے ماحولیاتی آلودگی بھی بڑھی ہے، انہوں نے کہا کہ طویل عرصہ سے تعطل کے شکار کوئٹہ ترقیاتی پیکج پر عملدرآمد سے مسائل حل ہوں گے اور کوئٹہ ترقیاتی پیکج شہر کے لئے گیم چینجر منصوبہ ثابت ہوگا جس سے معاشی سرگرمیوں میں بھی تیزی آئے گی، انہوں نے ہدایت کی کہ ترقیاتی منصوبوں کی تکمیل میں حائل ہرقسم کی رکاوٹ کو فوری طور پر دور کرکے انہیں جلد از جلد مکمل کیا جائے۔
